Marketin jasangarria: enpresen etorkizuna arlo honetan

Marketin jasangarria tresna boteretsua da, eta enpresen eta marken etorkizuna moldatuko du. Iraunkortasunari dagokionez gero eta erregulazio handiagoa dago, eta belaunaldi gazteenek gero eta kontsumo arduratsuagoa eskatzen dute. Hori dela eta, markek ikuspegi jasangarriak izan behar dituzte jarduera guztietan.

Marketin jasangarria funtsezko estrategia da gaur egungo merkatuan nabarmendu eta aurrera egin nahi duten enpresentzat, epe luzera balioa sortzea baitakar, haien ekintzen ingurumen- eta gizarte-eragina kontuan hartuta.

Gaurko eus-COMMERCEko artikuluan, marketin jasangarriaria eta horrek enpresen etorkizunean izango duen eraginari buruzko informazio gehiago emango dizugu.

Zertan datza zehazki marketin jasangarria?

Marketin jasangarria marketin-estrategiak gardentasunean eta erantzukizun sozialean zentratzea besterik ez da, gizartearentzat eta, oro har, ingurumenarentzat onura bilatuz.

Baina kontua ez da produktuak edo zerbitzuak sustatzea soilik, baizik eta modu gardenean komunikatzea enpresak emisioak murrizteko, baliabideak arduraz erabiltzeko eta zuzentasun soziala sustatzeko egiten dituen ahaleginak eta konpromisoak.

Marketin jasangarria sustatzen duten faktore nagusiak

• Gizarte- edo ingurumen-helburua duten marken aldeko joera areagotzen ari da: kontsumitzaileen %66 prest dago praktika jasangarriak egiten dituzten produktuengatik gehiago ordaintzeko. Horrek erakusten du kontsumitzaileak prest daudela iraunkortasunarekin konprometitutako markei ekonomikoki laguntzeko, eta ohar horiek garrantzi handia dutela erosketa-erabakiak hartzeko prozesuan.

• Presio erregulatzailea eta ekonomikoa: mundu osoko gobernuak ingurumena zaintzeko eta jasangarritasuna sustatzeko erregulazio zorrotzagoak ezartzen ari dira. Praktika jasangarri horietara egokitzen ez diren enpresek gero eta kontzienteagoa den merkatu batean isunak, ospe-kalteak eta lehiakortasun-galera izango dituzte. Adibidez, Europako Batasunean karbonoaren gaineko zerga ezarri da berotegi-efektua eragiten duten emisioak murrizteko eta klima-aldaketaren aurka borrokatzeko neurri gisa.

Joera honek enpresentzat dituen aukerak

Enpresentzat, marketin jasangarriak aukera berriak eskaintzen ditu produktu eta zerbitzu eraginkorragoak, ekologikoagoak eta sozialki arduratsuagoak garatzeko:

• Lehiarako abantaila: marketin jasangarriak lehiarako abantaila bereizgarria eman diezaieke enpresei. Eraginkorragoak, ekologikoagoak eta sozialki arduratsuagoak diren produktuak eta zerbitzuak garatzean, enpresak nabarmendu egin daitezke, merkatuaren eskaera betez. Gainera, kontsumitzaile horiek leial bihurtzen dira marka jasangarriekiko.
  
• Berrikuntza: Marketin jasangarriaren ikuspegia hartzeak berrikuntza sustatu dezake enpresetan. Irtenbide iraunkorragoak bilatzean, ingurumena gehiago errespetatzen duten produktuak eta zerbitzuak garatzeko aukera emango dieten teknologia, material eta prozesu berriak azter ditzakete enpresek.
• Ospea: Marketin jasangarriak enpresa baten ospea eta marka-balioa indartzen lagun dezake. Praktika jasangarriak hartu eta enpresaren balio eta ekintza iraunkorrak gardentasunez komunikatzean, konfiantza eta leialtasuna sor daitezke kontsumitzaileen artean. Ez da greenwashingik egin behar. Greenwashing-a jarduera engainagarria da, eta enpresa edo marka batek benetan dena baino ekologikoagoa edo jasangarriagoa izan nahi du. Marketin- eta komunikazio-estrategiak erabiltzean, ingurumen-konpromisoaren irudi bat aurkezten da, adierazpen horiek babesten dituen babesik edo ekintza zehatzik gabe.
• Merkatu eta segmentu berrietarako sarbidea: eskaera horiek asetzeko marketin-estrategiak egokitzean, enpresek zabaldu egin dezakete haien irismena, eta lehen beren produktu edo zerbitzuak kontuan hartu ez zituzten kontsumitzaileengana iritsi.
  

Iturria:

• puromarketing.com