2018an online erosi zuten EAEko biztanleen batez besteko gastua 2.396 euro izan zen
Internet bidez erosi zuten Euskadiko kontsumitzaileen batez besteko gastua 2.396 euro izan zen iaz: aurreko urtekoa baino % 45 handiagoa, eta Espainiako estatuko batezbestekoa baino % 26 handiagoa, hain zuzen. Bestalde, bidaiak, elikagaiak eta prestakuntza dira online egiten den gastu handieneko arloak; izan ere, EAEko biztanleek prestakuntzan eta bidaietan egindako gastua estatuko batezbestekoa baino askoz ere handiagoa da.
Horiek dira, besteak beste, Cetelem konpainiak egindako «M-commerce: la (R)evolución de la tienda online» azterlanaren ondorioak (Euskadiri bakarrik buruzkoa da azterlan hori). Azterlanak Internet bidez egindako erosketetan, merkataritza elektronikoko joeretan eta banaketaren zenbait sektoretan jartzen du arreta.
Azterlan horretan bildutako datuen arabera, EAEko internauten % 62k (Espainiako estatuari buruzko datua % 63 da) online erosketaren bat egin zuen mugikorraren bitartez iaz; horrek esan nahi du ehunekoetan 3 puntuko igoera izan dutela halako erosketek EAEn, aurreko urtearekin alderatuta. Produktu edo zerbitzu erosienak aisialdikoak, bidaiak eta modakoak izan ziren.
Batezbestekoaren gainetik
EAEko biztanleak batezbestekotik gora daude gailu mugikorrak eta gehigarriak mugikorraren bitartez erosteari dagokionez: % 32 eta % 29, hurrenez hurren. Erosketa horiek finantzatzeko aukerari gagozkiola, aitzitik, EAEko ehunekoa Espainiako estatuko gainerako lurraldeetan baino txikiagoa da: % 8 eta % 10, hurrenez hurren. Nolanahi ere, produktu finantzatuenak etxetresna elektrikoak, gailu mugikorrak eta etxerako produktuak dira.
Bitxia bada ere, gailu mugikorren erosketan jartzen badugu arreta, halako erosketak finantzatzea erabaki dutenen ehunekoa handiagoa da EAEn; Euskadin % 46 da datu hori, eta % 43, berriz, Espainiako estatuko gainerako tokietan. Baina finantzatutako batezbesteko zenbatekoa askoz ere txikiagoa da EAEn: 625 euro; Espainiako estatuan, berriz, batez besteko kopurua 1.277 euro da.
Iturria: EUROPAPRESS
By accepting you will be accessing a service provided by a third-party external to https://euscommerce.eus/
